దంత వేదాంతం
---------------------
ఈదంతాలకెంత పొగరో
వయసు మీదపడకముందు
ఒక్కొక్కటే రాలిపడి
తొర్రిపళ్ళల్లో తొండచిక్కిందని
అందరూ వెక్కిరించేలా చేస్తుంది.

ఈదంతాలకెంత బిగుతో
వయసు మీదపడి శరీరం
కట్టెలపొయ్యిమీదకెక్కి
దేహమంతా చితాభస్మమై
మిగిలినా మేం రాలిపడం పొమ్మంటూ

భీష్మించుకుని అలానే ఉండిపోతాయి.
ఎవ్వరూ ఎప్పుడూ నా పళ్ళు రాలగొట్టే
పనులేవీ నేప్పుడూ చేయలేదు
సుమా అనుకుంటూ
సగర్వంగా చెప్పుకుని మురిసిపోతుంటాయి.
ముచ్చటపడుతూంటాయి.

అలామనిషి బూడిదయినా చెక్కుచెదరనిది
దంత సౌందర్యమేనని ఎందరికి జ్ఞప్తికొస్తుంటుందో!
----------------------------------------------------------